جديد المواضيع

العودة   منتديات مدن > المنتديات العامة > مدينــــة الأصــــــــــدقـاء .

مدينــــة الأصــــــــــدقـاء . للمواضيع العامة غير المُصنفة !

الكلمات الدلالية (Tags)
لا يوجد
 
 
 
أدوات الموضوع إبحث في الموضوع انواع عرض الموضوع
قديم منذ /06-12-2010, 11:13 PM   #1

سونيا
كاتبة

 آلحآلـہ » سونيا غير متواجد حالياً
 وِلادَتيّ هُنا » May 2009
 كِتـابَاتِيّ » 145
 


المشاهدات: 18927 | التعليقات: 2 شعر سودانى (للشاعرة نضال الحاج)

قصيدة باللهجة السودانية العامية للشاعرة نضال حسن الحاج بعنوان أنا بكرهك

أنا بكرهك
بس بكرهك
دا أنا بكره اليوم الصنع قلباً يكورك ويندهك
أنا بكره الوطن البلم شرف الغرام المنتهك
من ياتو باب طليت علي ما كنت أصلاً بشبهك
أنا بكرهك
أنا شلت ريدك في القليب وسقيتو من دم العروق
صنقعت دليت النجم دنقرت كبيت نور وشوق
وعصرت موية الإنتظار ختيتا في وجع الحروق
كان النتيجة تبيع هواي وأريتو كان سويتلو سوق
أنا بكرهك
من وين أجيب ليك الدموع
من وين أصنقر حيل كلام كان أمنيات قلبو الرجوع
من وين إذا هتك الضلام حيل خيلي ألقالك شموع
لكني مجبور أطردك واقفل وراك باب الضلوع
أنا بكرهك
شديت رحالاتي ومشيت وكتين هتك حيلك هواي
ارتحت في موجي ورسيت
لا حرك الموج البحر
لا صد قلبي ولا قسيت
لكن طلعت خيال عشم
ضمخ رؤى الوجع المميت
أنا بكرهك
قدر اشتهاي
أنا بكرهك
قدر الغرام الكان زمان كابت مساماتي وهواي
أنا بكرهك
قدر إني ما لونت بيك كريات شراييني ودماي
أنا بكرهك
قدر إني غنيتك غناي
أنا بكرهك
من وين دخلت علي مدن شاخت من الوجع الأليم
من وين طرقت جدار قلب لقح هوى العشق العقيم
من وين سخت شمسك علي كانت سماي مليانة غيم
فتق جراحــاتي
فتق جراحاتي وامش
خليني في لهب الجحيم
أنا قلت ليك ..
أنا بكرهك
قدر المواسم الشادة خيل الريد عليك
أنا بكرهك
قدر المصائب الحارسة بوابات مجيك
أنا بكرهك
نفس المساحة وحجم قلبي الكان تملي بيشتهيك
بقى بكرهك
واتوكل أرحل مني فووت
حرمان علي قلبي الكلام
كان غيرك اجتاحو السكوت
خليهو قلبي الاندفن
تنسج عليهو العنكبوت
أوخلي ... من بعدك يموت
الموت أخير ..
من اني أفضل
في رحابك وفي رجاك
أنا كنت لو غاب القمر دائماً بضوي
ضلام دناك
وأنا كنت لو غيمك رحل
بطلع عشان اسكن سماك
وأنا كنت لو بردك نزل
بوقد صوابعي لهب حداك
لكن منو القدر كدا
والله لو أنا في محلك
بنسج الشمس احترام
واهديها ليك متمددة
بفتح كراريس الكلام
اختار حروفي واجردا
بنبش قبور المستحيل
كلمات شكر متفردا
لكن خسارة على قلب
حباك بلا ما يعرفك
لكن خسارة على قلب
حباك بلا ما يعرفك


بتأسفك وكتين عيوني يسوقن الشوق لي انتظارك
لما ليلي يسوق محاسنو وينهزم عندك نهارك
لما ما ابكي انهزامي عشان ابارك انتصارك
لما كوكبي ساب مدارو رحل عشان يسكن مدارك
كنت مالي زمان ومالك
لكن وحاتك بكرهك
ندمان
ندمان على عمراً معاك ضيعتو في غفلة زمن
ندمان علي
دمعاً سكبتوعلى رضاك وبلا تمن
أنا كنت بحلم في وجودك ينكسر خاطر الشجن
لكن رضاي عليك عشم أبليس قصاد جنة عدن
أنا بكرهك
كلما يطول ليلي ويواتيه العذاب
أنا بكرهك
كل ما القلم يركب مصاعب الدنيا
يمشي على الكتاب
أنا بكرهك
كلما الفراق كتل مضامين العشق سدالو باب
أنا بكرهك
قدر العيون ما تلبس التوب الزراق
تتوضأ موية الإنتحاب
أنا بكرهك
من كل باب أنا بكرهك
واتوكل أرحل من جواي
غلطان إذا قلبك هداك قال ليك حا تفضل غناي
غلطان إذا عقلك رضخ لي ظن يقول إنك حداي
والله ما فارق معاي
أنا كنت ناوي أجملك
بس كنت ناوي أجملك
وأمسك مضامين اللغات
من فيض حروفي أكملك
ترحل علي درب العشم
بي زاد هواي أحملك
وكتين يخش قلبك جراح
أقطع قليبي وأدملك
ندمان منو
أنا غايتو ما ندمان عليك
اتوكل أرحل من جواي عيش العذاب الباقي فيك
ولو قلبك اتجرأ رجع
حقك تلومو علي مجيك
شان قلبي انت مليتو دم
ياخ قلبي انت مليتو دم
ما عادلو باقي يسبو ليك
على كل حال
أنا بكرهك
عدد الحصى وعدد الرمال
أنا بكرهك
عدد الصواب والإحتمال
أنا بكرهك
عدد الحقائق والخيال
أنا بكرهك
عد الشنة وعدد الجمال
أنا بكرهك
عدد الإجابات والسؤال
أنا ابكرهك
عدد الشعر ما سنا سيف الإرتجال
أنا بكرهك
عدد اللي ممكن والمحال
أنا بكرهك
عد ما زمان قت ليك تعال
أنا بكرهك
مستورة حالي وراك وفوت
يا دابو ليلك همو طال
مستورة حالي وراك وفوت
يا دابو ليلك هموطال
على كل حال
أنا بكرهك

 

لا تسترجع الكثير مما يقال لك لكى لا تكتشف مساحة الخيال فى أقوالهم ومساحة الغباء بتصديقك لهم
( شهرزاد )

 

  رد مع اقتباس
 


الذين يشاهدون محتوى الموضوع الآن : 10 ( الأعضاء 0 والزوار 10)
 
أدوات الموضوع إبحث في الموضوع
إبحث في الموضوع:

البحث المتقدم
انواع عرض الموضوع

تعليمات المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code is متاحة
كود [IMG] متاحة
كود HTML معطلة

الانتقال السريع

شعر سودانى (للشاعرة نضال الحاج)



الساعة الآن 09:20 PM


Designed by q9eh.com
Powered by vBulletin® Copyright ©2000 - 2014, Jelsoft Enterprises Ltd. TranZ By Almuhajir